أنا اتجوزت واحد أرمل عنده بنتين صغيرين..قصة صعبة
انا اتجوزت شاب ارمل عنده بنتين صغيرين والحمد لله بعامل البنتين كويس جدا علشان يتامى وبحاول اعوضهم شوية عن فراق امهم عارفه ان صعب التعويض لكن بحاول على قد ما اقدر وفي استطاعتي
المشكلة بقى في جوزي مره فتحت الموبايل بتاعه لقيته بيكلم أصحابه عن زوجته المتوفيه الله يرحمها وبيحكيلهم قد ايه كان بيحبها وبيعشقها ومستحيل ينساها ومفيش واحده في الدنيا تقدر تعوض مكانها في قلبه او تاخد مكانها فالبيت.
انا شوفت الكلام ده بعيني ومثبت محادثه بينه وبين زوجته المتوفية هي محادثه قديمه شوية كانت بينهم وكان بيكلمها بشكل لطيف أوي وبيغازلها بكلام عمره من أول ماعرفته ما قالي زيه و رادد عليها برسالة جديدة مضمونها الله يرحمك يا حبيبة روحي وحياتي وحتى لما بيلعب مع بناته لوحدهم أنا ساعات اتصنت كده عليهم اشوف بيقولهم ايه وبسمعه بيقولهم انه كان بيحب امهم أووووووي.
ومرة قال لبنتهم بطريقة عفوية وهو حاضنها تعالي في حضني يا ريحة الغالية يابنت الغالية و بعدين لما اكتشف اني قاعده حسيت انه اتكسف مني لانه طبعا المفروض يراعي وجودي واحساسي ومشاعري واكتشفت انه مخبي صورتها في اوضة البنات وامه قالت انه كان بيعيط عليها بحىرقة زي الأطفال لما توفاها الله.
عارفه طبعا انها خلاص متوفية الله يرحمها ومش موجودة في حياتنا بس حازز في نفسي حبه ليها لحد دلوقتي وواضح انه كان بيحبها اكتر مني الف مره هو مش مقصر معايا خالص في حاجه ماديًا او عاطفيا بس كل اللي بشوفه ده مزعلني أووووي على نفسي وحاسه اني درجة تانيه بالنسبه له.
طبعا كل ده ملوش دعوة بالبنتين وحبي ومعاملتي ليهم هما ملهمش ذنب خالص في كل دة بس حبه ليها الواضح لحد دلوقتي هو اللي ماثر عليا جامد وعلى نفسيتي ومخليني مش مبسوطه معاه خالص ومش عارفه اعمل ايه لو الطلاق حل وهو صعب يتغير قولولي وأنا انفصل عنه على الرغْم حبي ليه بس أوقات مش بقدر أتحمل تصرفاته دي
